தொலைகாட்சி வரலாற்றில் முதல்முறையாக

வாக்குப்பதிவு நிறைவு பெற்றுள்ள நிலையில் முடிவுகள் வெளியிடுவது மற்றும் அதுவரையிலான தேர்தல் ஒளிபரப்புகள் குறித்து “பன்” டி.வி. நிறுவனத்தில் ஆலோச னைக்கூட்டம் நடைபெறுகிறது.

தலைமை நிர்வாகி : இன்னைக்கி வாக்குப்பதிவு முடிஞ்சுது...

செய்தி ஆசிரியர் : ஆமா சார்... இனிமே நாம கணிப்புகள வெளியிடலாம்...

தலைமை நிர்வாகி : மூணு நாள்ல நம்ம ரேட்டிங் எங்கயோ போயிடணும்...

செய்தி ஆசிரியர் : முடிவு வர்றப்போ மறுபடி விழுந்துருமே...

தலைமை நிர்வாகி : அத அப்புறம் பாப்போம்...நம்ம ஆதரவு அணி ஜெயிச்ச மாதிரி கணிப்புகள வெளியிடுங்க... நம்ம போற வேகத்துல 16 ஆம் தேதி வர்ற முடிவுகளே ஒண்ணு மில்லாம போயிடணும்...

செய்தி ஆசிரியர் : உண்மைதான் சார்... முடிவுகள் என்ன... நம்ம அணிக்கே ஒண்ணு மில்லாம போயிடும்... அதனால இப்பவே நம்ம அணிக்கு நெறய சீட் கிடைக்குறமாதிரி கணிக்கணும்...

ஊழியர் 1 : அகில இந்திய அளவுல யார் ஆட்சி அமைப்பாங்கன்னு போடணுமா....??

தலைமை நிர்வாகி : ஆமா... அதுல திமுக வுக்கு 28 சீட் கிடைச்சா மத்தியில என்ன நிலைமைன்னு யாராவது ரெண்டு பேர பேச வெக்கணும்...

செய்தி ஆசிரியர் : திமுக அவ்வளவு சீட்ல நிக்கக்கூட இல்லையே சார்...

தலைமை நிர்வாகி : நீங்க டிஎன்என்-ஒய்பிஎன், கய்ம்ஸ் டவ், கல் தக் மாதிரி டி.வி.லாம் பாக்குறதில்லையா... அவங்கள்லாம் கூச்சப்படாம அதிமுகவுக்கு 24, திமுகவுக்கு 23னு சொல்றாங்க...

ஊழியர் 2 : விவாதிக்க வர்றவங்க கூட்டிப்பாத்தா...

தலைமை நிர்வாகி : அதுக்குத்தான் இந்த மாதிரி டி.வி.லாம் பாக்கலையான்னு கேட்டேன்... இது எப்படினுலாம் கேட்கக்கூடாது.. இத வெச்சு விவாதம் பண்ணத்தான் கூப்புட்டோம்னு ஒரே அடியா போட்டுறாங்க...

செய்தி ஆசிரியர் : திமுக யார் கூட சேர்றதா கணிக்கணும்...

தலைமை நிர்வாகி : யார் கூட வேணும்னாலும் சேரும்னு கணிப்பு இருக்கணும்...

செய்தி ஆசிரியர் : இது மட்டும் இயல்பா சொல்லணுமோ...?

ஊழியர் 3 : அதிமுக...

செய்தி ஆசிரியர் : 23 சீட்ல ஜெயிச்சு படுதோல்வினு கணிப்பு இருக்கணும்... அப்படித்தான சார்...

தலைமை நிர்வாகி : இப்பதான் நீங்க நடுநிலையாப் பேச ஆரம்பிச்சுருக்கீங்க...

ஊழியர் 1 : மூன்றாவது அணிக்கு சீட் கம்மியாக் காட்டணும்...

செய்தி ஆசிரியர் : சார்... நம்ம ஆளுங்க ஜொலிக்க ஆரம்பிச்சுட்டாங்க சார்...

ஊழியர் 2 : மத்தில ஆட்சி அமைக்க நாம யாருக்கு ஆதரவு கொடுக்குறோம்...

தலைமை நிர்வாகி : யார் ஆட்சி அமைக்குறாங்களோ அவங்களுக்குத்தான்..

ஊழியர் 3 : விவாதத்திற்கு யாரக் கூப்புடணும்...

ஊழியர் 2 : நம்ம அணில ஒருத்தர், அணிய ஆதரிக்குற ஒருத்தர், எதிர் அணிகளத் தாக்குற ஒருத்தர்.. இப்புடி மூணு பேர்.. அப்பதான் நடுநிலையா இருக்கும்...

தலைமை நிர்வாகி : ஆஹா... பிரமாதம்... நம்ம அணில ஒரே மாதிரி யோசிக்க ஆரம்பிச்சுட்டோமே...

ஊழியர் 3 : அகில இந்திய அளவுல...

செய்தி ஆசிரியர் : காங்கிரஸ் அணிக்கும், பாஜக அணிக்கும் போட்டி இருக்குற மாதிரி கணிப்பு இருக்கணும்...

ஊழியர் 2 : ஆனா மூணாவது அணிக்கு நெறய சீட் வரும்போல இருக்கே... நம்ம கணிப்ப நம்புவாங்களா...

தலைமை நிர்வாகி : நம்புறதுக்கா கணிப்பு போடுறோம்.. நம்ம ஆசையக் கணிப்புன்னு போடுறோம்...

ஊழியர் 1 : மூணாவது அணிக்கு கம்மியா கிடைக்கும்னு பொய் சொல்ல ஏதாவது ஆதாரத்தக் காட்டணுமே...

செய்தி ஆசிரியர் : மம்தா பானர்ஜியே சொல்லிட்டாங்கன்னு சொல்லிடுவோம்...

ஊழியர் 3 : காங்கிரஸ், பாஜக அணிகளுக்கு கிடைக்குற சீட்னு நீங்க சொல்ற மாதிரி போட்டா 800 சீட் கிட்ட வந்துரும் போலருக்கே...

தலைமை நிர்வாகி : நம்ம கிட்ட யாரும் கேட்க முடியாதுல்ல...

செய்தி ஆசிரியர் : நம்ம அணிக்கு ஆதரவான நிலை இல்லைனா...

தலைமை நிர்வாகி : முதல்ல முடிவுகள மாத்திச்சொல்லணும்... அப்புறம் பாட்டுப் போடலாம்... பின்ன என்ன... இந்தியாவின் தொலைக்காட்சி வரலாற்றில் முதன்முறையாகன்னு அறிவிச்சுட்டு ஏற்கெனவே நாலுதடவ ஒளிபரப்பு செஞ்ச படம் ஒண்ணப் போட்டுட்டு ரெஸ்ட் எடுக்க வேண்டியதுதான்...